२५ मंसिर, काठमाण्डौ । जिल्ला प्रशासन कार्यलयमा मागेको २८ हजार रुपैयाँ धरौटी तिर्न नसक्दा एमाओवादी अध्यक्ष प्रचण्डलाई थप्पड हानेर बाग्लुङका पदम कुँवरलाई जेल चलान गरिएको छ ।

प्रहरीले उनलाई सोमबार काठमाडौं जिल्ला प्रशासनमा हाजिर गराएको थियो । सार्वजनिक अपराध मुद्दामा सुनुवाई गर्दै प्रमुख जिल्ला अधिकारी चुडामणी शर्माले २८ हजार धरौटी राखेर तारेखमा छोड्न आदेश दिएको थियो । तर, धरौटी राख्ने रकम नभएपछि उनलाई केन्द्रीय कारागार चलान गरिएको छ । उनले अब एक दिनको ३० रुपैयाँ बराबरले तोकिएको धरौटी पुरा नगरेसम्म जेलमा बस्नु पर्नेछ ।

महाराजगन्जस्थित २ नम्बर गणमा राखिएका पदमलाई जिल्ला प्रहरी कार्यालय हनुमानढोका ल्याएको केहीबेरमै सीडियो कार्यालयमा उपस्थित गराइएको थियो । गणका प्रहरीले आजै बिहान पदमका भिनाजुलाई फोन गरेर कपडा लिएर आउन भनेको थियो ।

कुँवरले गत मंसिर १ मा भृकुटीमण्डमा एमाओवादीद्वारा आयोजित चियापानमा प्रचण्डलाई झापड हानेका थिए । लगतै माओवादी कार्यकर्ताबाट कुटिएका कुँवरलाई प्रहरीले पक्राउ गरेको थियो ।