२९ मंसिर, काठमाण्डौं । आगोमा मोटरसाइकल गुडाएर कीर्तिमान राख्ने अभियानमा लागेका युवालाई सघाउँदा जलेर घाइते भएका तनहुँका सुरेश पन्थको उपचारका क्रममा मृत्यु भएको छ । पन्थको उपचारका क्रममा वीरअस्पतालमा गएराती निधन भएको हो ।

सुरुङभित्र पसेर आगो लगाउन थालेका २८ बर्षका पन्थको शरीरको ९० प्रतिशत भाग जलेको थियो । मोटरसाईकलमा चढी गोठ भित्र आगो लगाउँदै गरेका उहाँहरु एक्सासी चारै तर्फबाट सल्केको आगोमा परेका थिए । भारतीय सेनामा कार्यरत पन्थको उपचारका लागि भारत लैजाने तयारी भएपनि बिहीवार दिउँसो सुधार देखिएपछि भारत लैजाने योजना रोकिएको थियो । तर उनको राती नै निधन भयो ।

उनीसँगै आगो लगाउनेक्रममा घाइते भएका भरतसिंह थापाको भने लाइफ केयर अस्पतालमा उपचार भइरहेको छ ।