३ पुस, काठमाण्डौं । राष्ट्र बैंकले ग्राहकको पूर्ण पहिचानसहित परिवारका सबै सदस्यहरुको नागरिकतालगायत कागजात पेस गर्नुपर्ने व्यवस्था गरेपछि बैंक खाता खोल्न झन्झटिलो भएको छ ।

राष्ट्र बैंकले एक साताअघि सम्पत्ति शुद्धीकरण निवारण तथा आतंककारी गतिविधिमा वित्तीय लगानी नियन्त्रण गर्ने भन्दै खाता खोल्ने प्रक्रियालाई झन्झटिलो बनाएको हो ।

नयाँ व्यवस्थाअनुसार खाता खोल्न पतिपत्नी, बाबुआमा, बाजेबज्यै, छोराछोरी र बुहारीको नागरिकता नम्बर, जारी गरेको कार्यालय र जारी मितिसमेत उल्लेख गर्नुपर्ने हुन्छ । रोजगारीमा रहेका भए संस्थाको नाम, ठेगाना, पद र अनुमानित वाषिर्क आम्दानीसमेत उल्लेख गरेपछिमात्र खाता खेाल्न पाइन्छ ।

बैंकले आवश्यक ठाने अन्तवार्तासमेत लिन पाउने व्यवस्था गरिएको छ । व्यवसाय सञ्चालन गरिरहेकाहरुले स्थायी लेखा नम्बरका साथै अनिवार्य रुपमा वाषिर्क कारोबार हुने अनुमानित रकमसमेत उल्लेख गर्नुपर्छ ।

‘एउटा खाता खोल्नलाई कैंयाँै किसिमका कागजातहरु आवश्यक पर्ने व्यवस्था गरिएको छ,’ हिमालयन बैंकका प्रमुख कार्यकारी अधिकृत अशोक राणाले भने, ‘यसले गर्दा अहिले खाता खोल्न झन्झटिलो बनेको छ,’ नागरिक दैनिकमा खबर छ ।

नयाँ व्यवस्था अनुसार, खाता खोल्नेले आफु बसेको ठेगाना पुष्टि हुने कागजात पनि उपलब्ध गराउनुपर्ने हुन्छ । खाता खोल्नेको बैंकका कर्मचारीले स्थलगत अध्ययन गरी तयार पारेको नक्सासमेत राखिन्छ । डेरामा बस्नेले घरधनीको नाम, थर, ठेगाना र टेलिफोन नम्बर उपलब्ध गराउनुपर्नेछ । बैंकमा खाता खोलीसकेकाले पनि अब नयाँ विवरण बुझाउनुपर्ने भएको छ । यसका लागि बैंकहरुले वेबसाइट र पत्रपत्रिका मार्फत आवश्यक विवरण उपलब्ध गराउन सार्वजनिक आहृवान गरिरहेका छन् ।