विराटनगर, कार्तिक २९ - सुनसरीको धरानमा मंगलबार राति भएको आगलागीमा करोडौंको क्षति भएको छ । धरान ५ स्थित दिनेश अग्रवालको घरमा रहेको दिनेश इम्पोरियममा आगो लागेको हो । मध्यरातिदेखि आगो सुरु भए पनि त्यसको एक दुई घन्टापछि मात्र थाहा भएर सशस्त्र, नेपाल प्रहरी र स्थानीय बासिन्दाले नियन्त्रणको प्रयास गरेका थिए ।

धरान, विराटनगर र इटहरीका दमकल प्रयोग गरी बुधबार बिहान मात्र आगो नियन्त्रणमा लिइएको थियो । आगलागीबाट सुनचाँदीका गहना, नगद, पसलमा रहेका ठूलो परिमाणमा रेडिमेड र थान कपडा तथा घरका सबै धनमाल जलेर नष्ट भएको प्रहरीले जनाएको छ ।

प्रारम्भिक अनुमानअनुसार करिब ५ करोड रुपैयाँको क्षति भएको छ । आगो कसरी सुरु भयो भन्ने यकिन नभएपछि पटका पड्काउने क्रममा आगो सल्केको हुन सक्ने अनुमान गरिएको छ ।