काठमाण्डौं । काठमाण्डौंमा भोली शुक्रबार हुने कन्सर्टमा सहभागी हुन नेपाल आउन लागेका पाकिस्तानी गायक आतिफ अस्लमको सुरक्षार्थ एकहजार ६ सय प्रहरी तैनाथ हुने भएका छन् । नेपाल आउने अन्तराष्ट्रिय सेलिब्रिटी र उनीहरुको सुरक्षार्थ खटाइन लागिएको यो सबैभन्दा ठूलो प्रहरी संख्या हो ।

यसअघि नेपालमा आएका अन्तराष्ट्रिय सेलिब्रिटी भारतीय गायक कैलाश खेर, क्यानेडियन गायक ब्रायन एडम्स र उनको टोली तथा डेनिस पप व्यान्ड एलएलटीआरको सुरक्षामा खटिएका सुरक्षाकर्मीको तुलनामा आतिफको सुरक्षार्थ खटिएका प्रहरीको संख्या धेरै रहेको प्रहरी स्रोतले जनाएको छ ।

आतिफ पाकिस्तानी गायक भएको र उनको सुरक्षा संवेदनशीलताका आधारमा धेरै प्रहरी परिचालन गर्न लागेको महानगरीय प्रहरी वृत्त काठमाण्डौंले जनाएको छ । यसअघि एकहजार दुईसय प्रहरी परिचालन गरिने भनिएपनि बुधबार प्रहरी वृत र आयोजक ओडिसी एन्टरटेन्मेन्टसँग भएको छलफलमा थप चार सय प्रहरी थपिने निर्णय भएको कन्सर्ट आयोजक ओडिसी इन्टरटेन्मेन्टले जनाएको छ ।

सुरक्षा व्यवस्था मजबुद बनाउन कन्सर्टमा आउनेहरुको प्रवेश पास पनि यसपटक फरक पारिएको छ । प्रवेश पासका लागि फोटो र व्यक्तिगत विवरण पूर्णरुपमा लिइएको छ भने टिकट बिक्रि र प्रवेशद्वार पनि यसअघिका कन्सर्टमा भन्दा बढी तयार गरिएको छ ।

आतिफ शुक्रबार दिउँसो २ : ४० मा त्रिभुवन अन्तराष्ट्रिय विमानस्थलमा ओर्लिने कार्यक्रम रहेको छ । उनको कन्सर्ट हेर्न १५ हजार दर्शक आउने र उनका गीतमा माग गर्नेमा महिलाको संख्या बढी भएको आयोजकले जनाएका छन् ।

चार बजेदेखि ६ बजेसम्म चल्ने कन्सटर्मा उनको ‘दुरी’, ‘ओ लम्हे’, ‘पहेली नजर मे’, ‘ओ मेरे खुदा’, ‘तेरे लिए’ र ‘आदत’ लगायतका गीतहरु गाउँनेछन्र ।