मंसिर २२ गतेबाट देशभरका हलमा एकसाथ प्रदर्शनमा आउने भनिएको चलचित्र ‘लभ यू म्यान’ सेन्सरको झमेलामा फसेको छ । दुई केटाबीचको प्रेमसम्बन्ध र यौन सम्बन्धको बिषयलाई उठान गरेको यो चलचित्रलाई सेन्सर बोर्डले कानुन नै नभएको भन्दै सेन्सर नगर्ने बताएको छ ।

निर्माता युवराज खत्रीका अनुसार, नेपालको कानुनमा समलिंगीलाई मान्यता दिने वा नदिने भन्नेबारे स्पष्ट उल्लेख नभएको भन्दै लभ यू म्यानको सेन्सर रोकिएको हो । उनका अनुसार सिनेमाको सेन्सर नहुने सम्भावना बढेको छ ।

बीपी फुयाँलको निर्देशनमा तयार भएको यो चलचित्रमा राज आर्यन, सुरेश चौधरी, प्रनिशा अधिकारीलगायतका कलाकारको अभिनय छ । चलचित्रमा राज र सुरेशबीच हुने प्रेम सम्वन्धलाई देखाउन खोजिएको छ । चलचित्रमा यी दुई नायकले थुप्रै बेडसिन र चुम्बनको दृश्य दिएका छन् ।

सेन्सर बोर्डले चलचित्र पास नगर्ने भएपछि निर्माण युनिट तनावमा परेको छ । तर, केटी-केटी बीचको सम्वन्धलाई देखाइएको चलचित्र ‘सुनगाभा’लाई भने सेन्सर बोर्डले यसअघि पीजी सर्टिफिकेट दिइसकेको छ ।